Улууларга кам көрүү: Талас облусунда болжол менен 10 000 адам акысыз медициналык текшерүүдөн өттү.

Alliance Altyn жана «Үзүр» кайрымдуулук фонду Талас аймагындагы Президенттин өкүлчүлүгүнүн колдоосу менен акысыз медициналык кампанияны башташты. Компаниянын басма сөз кызматы билдиргендей, долбоордун алкагында 60 жаштан жогору болжол менен 10 000 жаран медициналык текшерүүдөн өттү.

Июль айында Бишкектен келген 20га жакын тажрыйбалуу дарыгерден турган команда Манас районунда эки күн, Айтматов районунда төрт күн иштеди. Жалпысынан болжол менен 5 800 жергиликтүү тургун акысыз медициналык текшерүүдөн өттү. Кампания учурунда кардиологдор, жалпы практика дарыгерлери, урологдор, гинекологдор, сүт бези адистери, ЛОР-адистер жана башка адистер жергиликтүү тургундарды кабыл алышты. Жарандар медициналык текшерүүдөн өтүп, зарыл болгондо анализдер тапшырып, ооруларды алдын алуу жана дарылоо боюнча кеңеш алышты.

Талас аймагында долбоорду ишке ашыруу учурунда болжол менен 10 000 адам медициналык текшерүүдөн өттү. Бул демилге Талас районуна жана Талас шаарына 60 жаштан жогору курактагы тургундардын ири бөлүгүнө жетүүгө мүмкүндүк берди. Биринчи эки күндүк кампания 2026-жылдын март айында аймактык борбордо өтүп, болжол менен 1 000 адамга кызмат көрсөткөн. Андан соң май айынын аягында Талас районундагы болжол менен 2 700 карыя беш күндүк мөөнөткө акысыз медициналык текшерүүдөн өткөн. Мындан тышкары, 300дөн ашык жаран лабораториялык анализдерден акысыз өттү.

Жергиликтүү тургундар бул мүмкүнчүлүккө ыраазычылык билдиришти. Алар буга чейин жогорку сапаттагы медициналык жардам алуу үчүн Бишкекке барууга аргасыз болушканын, райондорго адистердин келиши жана акысыз консультациялар алар үчүн чоң жардам болгонун айтышты.

Акысыз медициналык текшерүүлөрдү уюштуруу чыгымдары «Alliance Altyn» компаниясы тарабынан каржыланды. Бул демилгени Кыргыз Республикасынын Саламаттык сактоо министрлиги колдоп, анын аймак үчүн социалдык маанилүүлүгүн баса белгиледи. Талас облусу боюнча министрликтин координатору Алмаш Шадданбекованын айтымында, дарыгерлердин тартыштыгы эске алынса, мындай акциялар өтө маанилүү, анткени облуста 174 адис жетишпейт.

«Аймактарда мындай медициналык акцияларды өткөрүү калкка чоң жардам берет. Өзгөчө кары-картаңдардын адистерге жетүүсүн камсыз кылуу өтө маанилүү. Дарыгерлердин тартыштыгын эске алганда, мындай демилгелер медициналык кызматтарга жетүүнү жакшыртууга өбөлгө түзөт», — деди Алмаш Шабданбекова.

«Alliance Altyn» жана «Üzür» кайрымдуулук фондунун биргелешкен демилгеси Талас аймагындагы кары-картаңдардын саламаттыгын колдоого, ооруларды эрте аныктоого жана медициналык жардамга жетүүнү жакшыртууга багытталган. Ошондой эле долбоорду башка райондорго да кеңейтүү пландалууда.